DI BẸTA NIUS ABAUT JIZỌS KRAIST
AS JỌN TEK RAIT AM
JỌN CHAPTA 1  

Di Wọd Wé De Mek Pipul Gẹt Laif
 
(Vas 1-18)

1. Fọ stat ọf ẹvritin di Wan wé Im nem bi di Wọd bin dọn dè. Di Wọd an Gọd dé togẹda, an wetin Gọd bi, na im di Wọd bi tu.

2. Di Wọd an Gọd dé togẹda fọ stat ọf ẹvritin.

3. Gọd mek ọl tins tru di Wọd. Gọd nọ mek ẹnitin witaut di Wọd.

4. Laif kọm frọm di Wọd, an na dis laif bring lait to humanbin dẹm.

5. Di lait de shain insaid daknẹs, an daknẹs nọ fit kwẹnch am.

6. Gọd sẹn wan man wé im nem na Jọn.

7. Jọn kọm fọ tẹl pipul abaut di lait, so dat ọl pipul go hia Jọn im mẹsej an biliv di mẹsej.

8. Jọn imsẹf nọ bi di lait. I kọm jọs fọ tẹl pipul abaut di lait.

9. Dis lait bi di ril lait wé de kọm to di pipul wé dé insaid dis wọld an i de shain fọ ọl ọf dẹm.

10. Di Wọd dé fọ wọld bifọ, an no mata sé na tru Am na im Gọd mek wọld, stilyẹt pipul fọ wọld nọ nó Am.

11. I kọm to Im ón kọntri, bọt Im ón pipul nọ wẹlkọm Am

12. Bọt fọ ọl pipul wé wẹlkọm Am an wé put dẹm trọst fọ Am, I giv dẹm di rait to bikọm Gọd pikin dẹm.

13. Dẹm no bikọm Gọd pikin dẹm fọ di sem wè pipul de bikọm pikin dẹm fọ dẹm papa an mama, wé bi bai sé, dẹm bọn dẹm as pikin dem ọf papa wé bi humanbin. Na Gọd Imsẹf mek dẹm to bi Im pikin dẹm.

14. Di Wan wé Im nem na di Wọd kọn bikọm humanbin, an I liv wit ọs. I dọn sho ọs hau I tek lọv ọs an dé kaind to ọs wẹl wẹl, an I dọn ọlso sho ọs sé, wetin I bi de sho wetin Gọd bi tru tru. Wi dọn si as di Wọd tek dé wọndaful. Na Im Papa mek Am to dé wọndaful bikọs I bi Im Papa onli Pikin.

15. Jọn tọk abaut Am, an kọn shaut strọng strọng de sé, “Dis na di Man wé a tọk abaut Am wẹn a sé, ‘Di Pẹsin wé go kọm fọ mai bak dé impọtant pas mi, bikọs I dé bifọ mi a kọm dè.’

16. Bikọs I lọv ọs wẹl wẹl, I dọn giv ọl ọf ọs bẹta tins an stil de giv ọs mọ́ bẹta tins.

17. Gọd mek Mosis to giv ọs di Lọ, bọt na tru Jizọs Kraist na im Gọd sho ọs sé I lọv ọs an dé kaind to ọs wẹl wẹl. An na tru Jizọs Kraist na im I sho ọs wetin I bi tru tru.

18. Nobọdi dọn ẹva si Gọd. Bọt Gọd Im onli Pikin, wé bi di sem as Gọd an wé Im an Im Papa dé tait wẹl wẹl, na Im dọn sho pipul hu Gọd bi tru tru.

Return from NPL Bible New Testament John1 to Mercy Christian Ministry Homepage

Click BELOW to Donate to The FREE Distribution of Nigerian Pidgin Language Bibles